‘Screening’ di Kanser na pechu Boneiru

Na Boneiru ta bai kuminsá na òktober 2019 e asina yamá ‘pilot’ di e investigashon di poblashon (bevolkingsonderzoek) tokante kanser na pechu. E ‘pilot’ ta pa prepará un investigashon di poblashon tokante kanser na pechu pa hende muhé di 50 te ku 75 aña.

Kiko, dikon i pa ken?

Kiko ta kanser na pechu?

Tur tipo di kanser tin 1 karakterístika: un partishon deskontrolá di sélulanan di kurpa. Kanser na pechu ta un kanser ku ta desaroyá den i rondó di e tehido di e pechu.

Kiko ta un ‘screening’ pa kanser na pechu?

Un investigashon di poblashon ta un investigashon médiko grátis pa detektá malesanan tempran. Esei ta sosodé pa medio di un ‘screening’; un investigashon periódiko riba un periodo mas largu. Hende muhé di 50 te ku 75 aña ta risibí kada dos aña un invitashon pa e ‘screening’ di kanser na pechu. Si bo partisipá, nos ta saka x-ray di bo pechunan. Di e forma akí nos por mira den un fase tempran si bo tin kanser na pechu, hasta promé ku abo mes lo por ripará.

Dikon un ‘screening’ pa kanser na pechu?

Kanser na pechu ta e forma di kanser mas komun serka hende muhé. Intenshon di e investigashon di poblashon di kanser na pechu ta pa detektá kanser na pechu mas tempran posibel. E chèns ta mas grandi e ora ei ku e tratamentu tin éksito. Hopi biaha tambe mester di un tratamentu ménos riguroso.

Pa ken e ‘screening’ pa kanser na pechu ta?

Kanser na pechu ta mas komun serka hende muhé di 50 te ku 75 aña. Abo ta pertenesé na e grupo akí i bo ta sigurá serka ZVK? E ora ei bo ta risibí un invitashon pa partisipá. Ta ripití e investigashon kada dos aña, te ora bo kumpli 76 aña.

Abo mes ta disidí si bo ta partisipá

E ‘Screening’ di Kanser na pechu ta boluntario. Bo no ta obligá na partisipá. Bo no kier partisipá? E ora ei bo por duna di konosé esaki despues ku bo a risibí e invitashon.

Bo ta sinti algu apnormal? Nunka warda te ora bo risibí e invitashon!

E ‘Screening’ di Kanser na pechu ta di tal forma planiá ku tur hende muhé di 50 te ku 75 aña ta haña un invitashon denter di dos aña. Despues bo ta risibí kada dos aña di nobo un invitashon. Pero: si bo tin keho òf si bo sinti un kambio na bo pechu? Nunka warda te ora bo risibí e invitashon! Bai bo dòkter di kas mesora.

Kon e ‘screening’ pa kanser na pechu ta bai?

Bo ta risibí un invitashon via pòst. Si bo skohe pa partisipá, nos ta traha un sita pa bo na hospital Fundashon Mariadal. Aki ta saka un asina yamá ‘mamografia’: x-ray di e tehido di e pechu. Na Hulanda radiólogonan spesialmente entrená ta evaluá e pòtrètnan. Bo ta risibí e resultado denter di dos siman via pòst. Den kaso di un resultado apnormal ta informá bo dòkter di kas tambe. Traha e ora ei un sita mas rápido posibel serka bo dòkter di kas!

E ‘screening’ den 5 paso

1. E invitashon

Si bo risibí e invitashon aki bo mester tuma kontakto ku nos. Nos ta puntra si bo ta deseá di partisipá na e ’screening’. Nos ta hasi bo un par di pregunta tokante bo situashon di salú. Tambe nos ta deliberá e ’screening’ ku bo i nos ta kontestá bo preguntanan. Si bo partisipá, nos ta traha un sita pa bo na Fundashon Mariadal.

Por sosodé ku bo ta risibí un karta di invitashon pa e ’screening’, miéntras bo ta bou di tratamentu pa kanser na pechu. Esei ta pa motibu ku nos no ta na altura di esei. Ta asina pues ku nos no mag pidi informashon médiko sin bo pèrmit. Den e kombersashon telefóniko despues ku bo risibí e invitashon bo por indiká kon bo situashon ta.

2. Bo sita

E sita na Fundashon Mariadal ta dura mas òf ménos 20 minüt. Bo ta bin e sita ku e karta di invitashon i bo sédula. Na yegada un funshonario lo kontrolá bo datonan. Bo por tuma un asiento den e sala di espera.

Ta bon pa sa

  • Tur funshonario di e ’Screening’ di Kanser na pechu ta hende muhé.
  • Si bo tin problemanan médiko, pone e funshonarionan e ora ei na altura di esei.
  • Bisti paña di ariba kómodo.
  • No usa krema, puiru, loshon òf ‘zinkzalf’ riba e parti ariba di bo kurpa.
  • Sigui e instrukshonnan di e funshonarionan.
  • Pa e x-raynan ta primi bo pechunan entre dos plachi; esaki por hasi doló.

3. Sakamentu di x-ray

Ora bo ta na turno ta saka x-ray di bo pechunan. Bo por kita bo paña di ariba den un kabina privá. Un funshonario ta spliká bo e prosedura. Bo tin sikatrisnan riba bo pechunan? Òf bo pechunan ta hopi sensibel? Bisa e funshonario esei, e ora ei e por tene kuenta ku esei.

 

Ta saka dos x-ray di kada pechu. Tin bia mester di mas pòtrèt. Pa kada pòtrèt ta primi bo pechunan algun sekònde entre dos plachi. Esei ta nesesario pa saka un bon pòtrèt, ku ménos radiashon posibel. E preshon por hasi doló, pero no ta hasi daño na bo pechunan. E preshon ta hasi doló? Bisa e funshonario esei.

4. Evaluashon di e pòtrètnan

Ora kaba saka tur pòtrèt, bo por bolbe bisti bo paña i tuma asiento den e sala di espera. E funshonarionan ta wak si e imágennan di e pechunan a sali sufisiente visibel i si e pòtrètnan a logra téknikamente. Si esaki no ta e kaso? E ora ei ta posibel ku mester saka un òf mas pòtrèt di nobo. Di otro manera bo ta kla.

 

Ta manda e x-raynan pa dos radiólogo spesialmente entrená na Hulanda. Nan ta evaluá e pòtrètnan independiente di otro.

5. E resultado

o ta risibí e resultado denter di dos siman via pòst. Den kaso di un resultado apnormal ta pone bo dòkter di kas tambe na altura. Traha e ora ei un sita ku bo dòkter di kas mas rápido posibel!

Kiko e resultado por ta?

Bo por risibí un di e tres siguiente resultadonan:
– no a haña niun apnormalidat
– no tin sufisiente informashon
– a mira un apnormalidat

1. No a haña niun apnormalidat

No a haña ningun indikashon di kanser na pechu riba e x-raynan. Aki dos aña bo por partisipá atrobe na e investigashon di poblashon. E investigashon no ta duna garantia total. Tin un posibilidat ku no ta diskubrí kanser na pechu. Tambe kanser na pechu por surgi entre dos ’screening’. Si bo haña problema di hinchamentu, doló òf iritashon na bo pechunan? Bai bo dòkter di kas mesora!

2. No tin sufisiente informashon

E x-raynan no ta duna sufisiente informashon pa por hasi un bon evaluashon. Mester di mas investigashon den hòspital. Esaki por ta por ehèmpel un x-ray èkstra òf un ekografia. Den mayoria kaso no tin niun problema.

3. A mira un apnormalidat

A mira riba e x-raynan un apnormalidat ku por ta kanser na pechu. Tin mester di mas investigashon den hòspital. Esei por ta un x-ray òf un ekografia. Si ta nesesario ta kita un pida tehido chikitu for di e pechu. Esei no nesesariamente ta nifiká ku bo tin kanser na pechu.

Kontakto ku bo dòkter di kas

Ta posibel ku mester di mas investigashon. Por ehèmpel pasobra e x-raynan di bo pechunan no ta duna sufisiente informashon. Òf pasobra riba un di e pòtrètnan a mira un apnormalidat. Den e kaso ei nos ta pone bo dòkter di kas na altura. E dòkter di kas ta sòru pa pasa bo pa hòspital.

Bo datonan personal i bo privasidat

Datonan personal

Nos ta risibí bo datonan via e Direktorado di Asuntunan Sivil di Entidat Públiko Boneiru (OLB). Si bo partisipá na e ’Screening’ di Kanser na pechu bo ta duna pèrmit pa uza bo dato- i resultadonan di e investigashon pa e investigashon di poblashon i eventualmente pa mas investigashon den hòspital.

Bo privasidat

E datonan di e ‘screening’ ta anónimo. E resultadonan di e ’screening’ nos ta uza pa sigui mehorá mas i mas e investigashon di poblashon. Pa e motibu ei nos ta interkambiá datonan ku institutonan di investigashon i di kuido. Al respekto nos ta tene nos mes na e lei Protekshon di Datonan Personal BES. Si bo no ta deseá pa nos kompartí bo datonan, bo por duna di konosé esei na nos den e kombersashon telefóniko pa bo sita.

Ken ta organisá e ‘Screening’ di Kanser na pechu?

Direktorado Komunidat i Kuido di Entidat Públiko Boneiru (OLB), hospital Fundashon Mariadal (FM) i Ofisina di Seguro di Kuido BES (ZVK) ta traha huntu pa realisá e ‘screening’.

Mas informashon

Wak pa mas informashon riba e wèpsait www.screeningkansernapechu.com. Bo por yama nos tambe riba number di telefòn +599 7810476 of manda un e-mail pa info@screeningkansernapechu.com

 

 

‘Screening’ di Kanser na pechu

Bo a chèk kaba? Partisipá!